काठमाडौं । मलेसियाविरुद्ध कीर्तिमानी जित निकाल्दै नेपाल लगातार दोस्रो जितसहित आईसीसी ट्वान्टी–२० विश्वकप एसिया छनोटको सेमिफाइनलमा प्रवेश गरेको छ ।

मंगलबार कीर्तिपुरस्थित त्रिवि क्रिकेट मैदानमा भएको खेलमा मलेसियाविरुद्ध ६ विकेटको जित निकाल्दै नेपाल समूह चरणको अन्तिम खेलअगावै सेमिफाइनल प्रवेश गरेको हो । मलेसियाले प्रस्तुत गरेको १६६ रनको लक्ष्य नेपालले १८ ओभरमा चार विकेट गुमाएर पूरा गर्यो । ओपनर कुशल भुर्तेल आउट भएपछि क्रिजमा आएका कुशल मल्लले आक्रमक ब्याटिङ गर्दै २५ बलमा अर्धशतक बनाए । मल्लले ६५ र कुशल भुर्तेलले ४३ रन बनाएका थिए ।

आसिफ शेख ३२ र रोहित पौडेल २ रन बनाएर आउट भएका थिए । मल्लले ३४ बलमा ७ छक्का र २ चौका प्रहार गरे ।