काठमाडौं । नेकपा (एमाले)का अध्यक्ष केपी शर्मा ओलीले कांग्रेसले आफूसँग कति सिट छ भन्ने समेत थाहा पाउन छाडेको आरोप लगाएका छन् । पार्टी कार्यालय च्यासलमा आयोजित पार्टी प्रवेश कार्यक्रममा ओलीले ८७ सिट भएको कांग्रेस ३२ सिटको पछाडि लुरुलुरु लागेर निरीह भएको टिप्पणी गरे । उनले नेपाली कांग्रेस पुरानो भएको दाबी गर्दै कांग्रेसलाई मेवा र एमालेलाई आँपको रुखसँग तुलना गरे ।
उनले नेकपा (एकीकृत समाजवादी)का अध्यक्ष माधव नेपाल भने कांग्रेस, माओवादी केन्द्रको पछि लाग्नु स्वभाविक हुने बताए । ओलीले माओवादीका नेता कार्यकर्ताले आफूसँगको भेटमा गुनासो पोख्ने गरेको बताउदै माओवादीसँग कुनै नीति नभएको टिप्पणी गरे । माओवादीमा छोरी ज्वाइँ, भाइ भतिजा भान्ज सप्रेको तर माओवादी नेता कार्यकर्ता पीडित भएर तड्पिएको बताए ।