काठमाडौं ।नेपाल क्रिकेट संघ (क्यान)को केन्द्रिय सदस्यमा दाङका प्रदीप मजगैया निर्बिरोध निर्वाचित भएका छन्। प्रदीप लुम्बिनी प्रदेशबाट केन्द्रिय सदस्यमा सर्वसम्मत रुपमा निर्वाचित भएका हुन् ।

उनी संगै केन्द्रीय कार्यसमितिमा ६ जना निर्बिरोध निर्वाचित भएका छन् । अध्यक्षमा चतुरबहादुर चन्द, उपाध्यक्षमा रोशन सिंह, कोषाध्यक्षमा पदमबहादुर खड्का, महिला सदस्यमा जयन्ती देवी भट्ट र कर्णाली प्रदेशमा श्रीधर केसी निर्विरोध भएका हुन् । यस्तै संघको सचिवमा पूर्वखेलाडी पारस खड्का निर्वाचित भएका छन् । शनिबार भएको मतदानमा निवर्तमान कार्यवाहक सचिव प्रशान्तबिक्रम मल्ललाई पराजित गर्दै पारस निर्वाचित भएका हुन् ।

कुल ८५ मतदाता रहेकामा ७५ मत गनिसक्दा पारसले जितका लागि आवश्यक ४३ मत पाएका हुन् । पारसले ४३ मत पाउँदा प्रशान्तले ३२ मत पाएका छन् । यद्यपि मतपरिणामको औपचारिक घोषणा हुन बाँकी छ ।