नेपालगंज । बाँकेको नेपालगञ्ज उपमहागरपालिकामा राष्ट्रिय प्रजातन्त्र पार्टीले जित हात परेको छ । राप्रपाले स्थानीय तहको चुनावमा उपमहानगरपालिकामा पहिलो जित हात पारेको हो ।

राप्रपाका उम्मेदवार धवल शम्शेर राणाले १२ हजार ५ सय १५ मत ल्याएर जित हात पारे । उनका निकटतम प्रतिद्वन्द्वी कांग्रसेका डा. सुरेशकुमार कनौडिया ८ हजार ७ सय ३० मत ल्याएर पराजित भए । राणाले ३ हजार ७ सय ८५ मत अन्तरले मेयरमा बाजी मारेका हुन् ।

उपमेयरमा भने कांग्रेसकी उमा थापमगर विजयी भएकी छिन् । उनले १० हजार ७ सय ३१ मत ल्याएर उपमेयर विजयी भइन् । उनकी निकटतम प्रतिस्पर्धी राप्रपाकी रमारानी वैश्यले ८ हजार ९ सय २४ मत ल्याइन् । नेपालगञ्जका निर्वाचन अधिकृतले अन्तिम मतपरिणाम घोषणा गरिसकेका छन् ।