संघीय संसद अन्तर्गत प्रतिनिधि सभाको सभामुख चयनका लागि बुधबार उमेदवारी दर्ताको कार्यक्रम रहेको छ ।

सभामुखका आकांक्षीहरुले आज दिउँसो १ बजेदेखि ४ बजेसम्म उम्मेदवारी दर्ता गर्नुपर्ने कार्यतालिका रहेको छ ।

दिउँसो सवा ४ बजे दर्ता उम्मेदवारहरुको नामावली प्रकाशन गर्ने कार्यतालिका रहेको छ ।

अहिलेसम्म कुनै पनि दलले सभामुखको उम्मेदवारको नाम चयन गर्न सकेका छैनन् ।

सत्ता गठबन्धन दलहरुबीच नेकपा (एमाले) ले सभामुख पाउनु पर्दछ । एमालेले पनि उम्मेदवार तोक्न सकेको छैन ।

स्रोतका अनुसार झापाबाट निर्वाचित एमाले अध्यष केपी ओलीका विश्वासपात्र देवराज घिमिरेले उम्मेदवारी दर्ता गर्ने अनुमान गरिएको छ ।

प्रमुख प्रतिपक्षी दल नेपाली कांग्रेसले सभामुखमा उम्मेदवारी दिने या नदिने विषयमा पदाधिकारी तहमा छलफल गर्दै छ ।

एक मात्र उम्मेदवार भएको अवस्थामा भने सभामुख चयन निर्विरोध हुनेछ ।

मतदानमा जानुपरे सभामा तत्काल कायम रहेका सदस्य संख्याको बहुमतबाट निर्वाचित गरिनेछ ।

कुल २७५ सदस्यीय प्रतिनिधि सभामा निर्वाचित हुन कम्तीमा १३८ सदस्यको आवश्यकता पर्नेछ ।