काठमाडौँं – नेपाली कांग्रेस सुदूरपश्चिम प्रदेश संसदीय दलका नेतामा कमलबहादुर शाह चयन भएका छन् । कैलाली निर्वाचन क्षेत्र नम्बर २ को प्रदेशसभा (क) बाट निर्वाचित शाह बुधवार दलको नेतामा सर्वसम्मत चयन भएका हुन् ।

दलको नेतामा आकांक्षी रहेका सबैले शाहलाई समर्थन गरेपछि उनी सर्वसम्मत चयन भएको प्रदेश महामन्त्री मेघराज खड्काले जानकारी दिए । कांग्रेस संसदीय दलको नेतामा बहादुरसिंह थापा‚ दिवानसिंह विष्ट‚ मेघराज खड्का‚ प्रकाश देउवासहितका ७ जनाले आकांक्षा राखेका थिए ।

शाह महासमिति सदस्य समेत रहेका पार्टी सभापति शेरबहादुर देउवाका भतिजा प्रकाशको समर्थनमा दलको नेता बनेका हुन् । मंगलवार बसेको प्रदेश पदाधिकारीको बैठकले दलको नेतामा आकांक्षीहरूलाई सर्वसम्मत चयन गर्न सुझाव दिएको थियो तर सहमति नजुटेपछि प्रदेश उपसभापति लोकराज अवस्थीको संयोजकत्वमा निर्वाचन समिति बनाइएको थियो ।

उक्त समितिले दिउँसो साढे २ बजेसम्म उम्मेदवार मनोनयनको समय तोकेको थियो तर नेताहरूबीच मनोनयन दर्ता गर्ने समय सकिँदै गर्दा सर्वसम्मत नेता चयन गर्ने सहमति गरेका हुन् ।

निर्वाचन समितिका संयोजक लोकराज अवस्थीले दलको नेताका लागि शाहले मात्र मनोनयन दर्ता गराएको भन्दैै उनलाई सर्वसम्मत घोषणा गर्ने तयारी भइरहेको जानकारी दिए ।