काठमाडौं – २३ वर्षमुनिको बङ्गबन्धु एसियन सेन्ट्रल जोन पुरुष भलिबल च्याम्पियनसिपको पहिलो सेमिफाइनलमा नेपालले आइतबार आयोजक बंगलादेशसँग खेल्दैछ । ढाकामा हुने नेपाल र बंगलादेशबीचको पहिलो सेमिफाइनल खेल दिउँसो पौने ३ बजे सुरु हुनेछ ।

नेपाल बंगलादेशलाई हराएर फाइनल पुग्ने योजनामा रहेको छ । बंगलादेश पनि नेपाललाई हराएर उपाधि नजिक पुग्न चाहन्छ । बंगलादेश लिग चरणमा शीर्ष स्थानमा रहदै सेमिफाइनल पुगेको हो । नेपाल पुछारमा रहेको थियो । बंगलादेशले लिग चरणको तीन खेलमै जित निकालेको थियो ।

नेपालले भने तीन खेलमै हार व्यहोरेको थियो । तर, प्रतियोगितामा चार टोलीको सहभागिता भएकाले चारै टोलीले सेमिफाइनलमा स्थान बनाएका हुन् ।

यस्तै अर्को सेमिफाइनलमा श्रीलंका र किर्गिस्तानबीच खेल हुनेछ ।