काठमाडौं – वेस्ट बैंकको झडपका दुई छुट्टाछुट्टै घटनामा इजरायली सेनासँगको झडपमा मङ्गलबार बिहान दुई दाजुभाइसहित तीन प्यालेस्टाइनीको मृत्यु भएको छ ।

प्यालेस्टाइनको स्वास्थ्य मन्त्रालयले प्रेस विज्ञप्ति जारी गर्दै २२ वर्षीय जावाद अल–रिमावी र उनका २१ वर्षीय भाइ जाफरको वेस्ट बैंक सहरको उत्तरपश्चिमी काफ्र ईन गाउँ नजिकै इजरायली सैनिकहरूले गोली हानी हत्या गरेको जनाएको छ। त्यस्तै विज्ञप्तिमा जनाइएअनुसार दुई दाजुभाइ गम्भीर घाइते भएको र सल्फित अस्पतालमा उपचारका क्रममा निधन भएको हो ।

यसैगरी स्वास्थ्य मन्त्रालयले जनाए अनुसार अर्का प्यालेस्टाइनी, मुफिद खलिल, दक्षिणी वेस्ट बैंक सहर हेब्रोनको उत्तरमा बेइट उमर गाउँमा झडपको क्रममा मारिएका हुन् ।

इजरायली सैनिकहरूले गाउँमा आक्रमण गरेपछि हिंसात्मक झडप सुरु भएको थियो र खलिलसहित नौ जना युवा घाइते भएको प्यालेस्टिनी स्रोत र प्रत्यक्षदर्शीहरूले बताएका छन् ।