जनकपुरधाममा रहेको जानकी मन्दिरमा विद्यूतीकरणको नाममा करोडाैं रुपैया लगानी गरेर विद्युतीकरण गरिएपनि लक्ष्मीपूजाको दिन मन्दिरमा बत्ती नबलेपछि अहिले फेरि वृहत्तर जनकपुर क्षेत्र विकास परिषदको आलोचना भएको छ ।

मधेस प्रदेश सरकार उद्योग, पर्यटन, वन तथा वातावरण मन्त्रालयको बजेटमा करिब पौने ११ करोडको लागतमा वृहत्तर जनकपुर क्षेत्र विकास परिषदद्वारा विद्युतीकरण गरिएको थियो । तर नेपालीहरुले मनाउने उज्यालो पर्वको रुपमा रहेको तिहारको लक्ष्मीपूजाको दिन मन्दिर परिसर भने विरानो देखियो ।

वरिपरिका निजी भवनहरु झकिझकाउ देखिँदा मन्दिर परिसर भने विरानो देखिएको थियो । विगतदेखि नै अड्डा अदालतको लफडाका कारण चर्चामा रहेको उत्त विद्युतीकरण फेरि त्यहाँका स्थानीयलाई बहसको विषय बनेको छ । समाजसेवी समाजसेवी मुन्ञ्जय राउतले ठूलो रकम खर्च गर्दा पनि यस्तो हविगत देखिनु समग्र जनकपुरवासीको दुर्भाग्य रहेको बताए । यस विषयमा सम्बन्धीत निकायले जवाफ दिनुपर्ने उनको भनाई छ ।

बृहत्तर जनकपुर विकास परिषदका पुर्ब अध्यक्ष बलराम ठाकुरले भने ७ करोड मात्रै लगानी भएको र प्रदेश सरकारको बजेट खर्च गरिएको बताए । आफूहरुले विद्युतीकरण गरे पनि विजुली बाल्ने काम आफूहरुको नभएको ठाकुरको भनाई छ ।

बत्ति बाल्नेकाम मन्दिर विकास समितिको रहेको उनले बताए । सरकारले आर्थिक वर्ष २०७६÷०७७ मा वृहत्तर जनकपुर क्षेत्र विकस परिषदलाई विभिन्न मन्दिरमा बती जडान गर्न बजेट उपलब्ध गराएको थियो ।

सो बजेटमा जानकी मन्दिर, लक्ष्मण मन्दिर, विवाह मण्डप, राम मन्दिर, गंगा सागर पोखरी, स्वर्गद्वारी र बारास्थित गढीमाई मन्दिरमा विद्युतीकरण गर्न भनिएको थियो ।
तर बजेट अपुग भएको भन्दै जानकी मन्दिर, लक्ष्मण मन्दिर र विवाह मण्डपमा मात्र विद्युतीकरण गरिएको थियो । तर त्यो पनि जानकी मन्दिरमाथि एक करोड रुपैयाँभन्दा बढी रकम बक्यौता कारण सञ्चालनमा आउन सकेन ।