काठमाडाैं – जिल्ला ट्राफिक प्रहरी कार्यालय तनहुँले एक वर्षको अवधिमा सवारीसाधन कारबाही गरेर तीन करोड ७९ लाख ३३ हजार रुपैयाँ राजस्व संकलन गरेको छ । आर्थिक वर्ष २०७८/७९ मा ५५ हजार छ सय सवारीसाधनलाई कारबाही गर्दा उक्त रकम संकलन भएको हो ।

सबैभन्दा बढी मोटरसाइकललाई कारबाही गर्दा राजस्व संकलन भएको छ । नियम उल्लंघन गरी सवारीसाधन चलाउनेमा दुई पाङ्ग्रे चालक रहेको ट्राफिक प्रहरी कार्यालयका प्रमुख प्रहरी नायब निरीक्षक गोकर्ण नेपालले जानकारी दिए ।

उनका अनुसार २० हजार ५०० मोटरसाइकललाई कारबाही गर्दा एक करोड ४७ लाख ३९ हजार ५०० राजस्व संकलन भएको छ ।

त्यस्तै ११ हजार २२१ ट्रक टिपरलाई कारबाही गर्दा ७७ लाख ८३ हजार, सात हजार ५०० तीन बसलाई कारबाही गर्दा ४८ लाख ४३ हजार ५१२ हजार ३५७ रुपैयाँ जीप कारलाई कारबाही गर्दा ७९ लाख ४४ हजार ५०० र दुई हजार ९६६ रुपैयाँ ट्याक्टरलाई कारबाही गर्दा २० लाख ३२ हजार रुपैयाँ राजस्व संकलन भएको छ । अन्य ६५६ सवारीसाधनलाई कारबाही गर्दा चार लाख २३ हजार रुपैयाँ संकलन भएको कार्यालयले जनाएको छ ।

‘मोटरसाइकल र स्कुटर चालकबाट बढी नियम उल्लङ्घन हुने गरेको छ,‘ उनले भने, ’सवारी साधनको कागजात नभएका र लाइसेन्स नभएका पनि बढी छन् ।’ सवारी साधनका धनीलाई कारबाहीसँगै सवारीधनीलाई नियमबारेमा पनि जानकारी गराउने गरेको नेपालले बताए ।

प्रहरीले मादक पदार्थ सेवन गर्नेविरुद्ध पनि चेक कडाइ गर्ने गरेको छ । उक्त आर्थिक वर्षमा ३८३ सवारीसाधनका धनी मादकपदार्थ सेवन गरेबापत कारबाहीमा परेका छन् । उनीहरुबाट तीन लाख ८३ हजार रुपैयाँ राजस्व संकलन भएको बताइएको छ ।