विराटनगर । प्रदेश १ सरकारले चालु आर्थिक वर्ष २०७८/०७९ मा  पूँजीगततर्फ ९० प्रतिशत बजेट खर्च गरेको छ ।

असार २५ गतेसम्म  प्रदेश सरकारले विनियोजन भएको बजेटको ९० प्रतिशत खर्च गरेको हो । प्रदेश १ सरकारको बजेट खर्चमा यो नयाँ रेकर्ड हो ।

प्रदेश १ ले चालु आर्थिक वर्षका लागि पूँजीगततर्फ १८ अर्ब छ करोड ३० लाख ८५ हजार बजेट विनियोजन गरेको थियो । जसमध्ये १६ अर्ब ८५ करोड बजेट खर्च भएको आर्थिक मामिला तथा योजना मन्त्रालयका सचिव सुमन दाहालले जानकारी दिए । यो खर्च ९० प्रतिशत रहेको  हो । गत आर्थिक वर्ष प्रदेश सरकारले पूँजीगत खर्च बढीमा ६५ प्रतिशतमात्रै गरेको थियो ।

चालु आर्थिक वर्षमा प्रदेश सरकारले (सशर्त अनुदान थपसहित) ३४ अर्ब ५४ करोड १३ लाख बराबरको बजेट ल्याएको थियाे । जसमध्ये  ३० अर्ब २८ करोड खर्च भएको छ । चालुतर्फ बजेट १६ अर्ब ६३ करोड आठ लाख बजेट मध्ये ७९ प्रतिशत बजेट खर्च भएको छ ।  स्थानीय तहको अनुदान ९८ प्रतिशत बजेट खर्च भएको छ ।