काठमाडौं । इजरायली सेनाले कब्जा गरेको पूर्वी जेरुसेलमको अल अक्सा मस्जिदमा छापा मार्दा कम्तिमा १ सय ५८ जना प्यालेस्टाइनी घाइते भएका छन् ।

सेनोले सो मस्जिदबाट सयौंको संख्यामा रहेका प्यालेस्टाइनीलाई नियन्त्रणमा लिएको अधिकारीहरुले जनाएका छन् । बिहानको प्रार्थनाका लागि मस्जिदमा भेला भएको बेलामा सेनाले छापा मारेको अन्तर्राष्ट्रिय समाचार संस्थाहरुले जनाएका छन् । सुरक्षाकर्मी पुगेलगत्तै मस्जिदमा रहेका प्यालेस्टाइनीहरुले ढुंगामुडा गरेको सेनाको दावी छ ।

स्थितिलाई नियन्त्रणमा लिन सुरक्षाकर्मीले अश्रु ग्यास र ग्रेनेडहरु प्रहार गरेको बताइएको छ । सो मस्जिदमा एक वर्षयता भएको सबै भन्दा ठूलो आक्रमण भएको अधिकारीहरुले जनाएका छन् । अल अक्सामा सुरक्षाकर्मीको उपस्थितिलाई प्यालेस्टाइनीहरुले उत्तेजकको रुपमा हेर्दा बेला बेलामा झडप हुने गरेको छ ।

इजरायली प्रहरीले घटनास्थलबाट तीन सय भन्दा बढी प्यालेस्टाइनीलाई पक्राउ गरेको दावी गरेको छ । तर प्रदर्शनकारीले चार सयको हाराहारीमा पक्राउ परेको दावी गरेका छन् । प्रहरीले भने मस्जिदमा आक्रमण भएलगत्तै त्यसको नियन्त्रणका लागि आफूहरुले बल प्रयोग गरेको प्रतिक्रिय दिएका छन् ।

सो मस्जिदमा करिब ६० हजार मानिस प्रार्थनाका लागि भेला भएको बताइएको छ ।