काठमाडौं । पपुवा न्युगिनी (पीएनजी)विरुद्ध नेपाली राष्ट्रिय क्रिकेट टोलीले आजदेखि घरेलु मैदानमा दुईवटा एकदिवसीय खेल खेल्दैछ । त्रिवि क्रिकेट मैदानमा हुने खेल ९ बजे सुरु हुनेछ ।

खेलअघिको पत्रकार सम्मेलमा नेपाली टोलीका मुख्य प्रशिक्षक पुवुदु दासानायकेले टोलीमा युवा खेलाडीहरु रहेकाले विस्तारै टिम बन्दै जाने प्रतिक्रिया दिएका छन् ।

हालै युनाईटेड अरब इमिरेट्स (यूएई)मा सम्मन्न विश्वकप लिग–२ अन्तरगतको त्रिदेशीय सिरिजमा पीएनजीसँग खेलेका दुवै खेलमा नेपालले जित निकालेको थियो । नेपालले पहिलो खेलमा दुई विकेट र दोस्रो खेलमा सात विकेटले पीएनजीलाई हराएको थियो । आज हुने खेलमा पनि जित निकाल्ने लक्ष्यसहित नेपाली टोली मैदान उत्रने छ ।

यस्तै खेलअघि आयोजित पत्रकार सम्मेलनमा बोल्दै पिएनजीका प्रशिक्षक कार्ल सान्ड्रीले नेपाल जस्तो क्वालिटी टोलीसँग खेल्न पाउनु आफू र टोलीका लागि निकै नै राम्रो भएको बताए ।

आज र भोलि पीएनजीसँगको एकदिवसीय खेलपछि नेपालले मलेसियालाई समेट्दै चैत १४ गतेदेखि २१ गतेसम्म त्रिदेशीय टी–२० श्रृङखला खेल्नेछ ।

एकदिवसीय र टी–२० श्रृङखलाका लागि समग्रमा १ करोड ४२ लाख ६० हजार खर्च हुने प्रारम्भिक अनुमान रहेको नेपाल क्रिकेट संघ (क्यान)ले जनाएको छ ।

क्यानका अनुसार एकदिवसीय श्रृङखलाको म्यान अफ दी म्याचले एक सय ५० डलर र प्रतियोगिताको सर्वोत्कृष्ट खेलाडीले तीन सय डलर पाउने छन् ।

यस्तै, ट्वान्टी २० को म्यान अफ दी म्याचले एक सय डलर र प्रतियोगिताको सर्वोत्कृष्ट खेलाडीले पाँच सय डलर पाउने छन् ।