काठमाडौं । नेकपा एमालेका महासचिव शंकर पोखरेलले राप्रपाले नेपालगन्जमा बीपी कोइरालाको सालिकमा कालोमोसो दल्ने र तोडफोड गरेकोमा विरोध जनाएका छन् । उनले यसबाट राजावादीहरू के चाहन्छन् भन्ने स्पष्ट भएको बताएका हुन् ।

उनले पूर्वराजा ज्ञानेन्द्रको शासन बेहोर्नु परेको भए बीपी पनि गणतन्त्रका पक्षमा उभिने जिकिर गरे । उनले यो कुरा नेपालमा लोकतन्त्र र राजसंस्था सँगै जान सक्दछ भन्नेहरूले बुझ्नुपर्ने बताए ।

उनले सामाजिक सञ्जालमा लेखेका छन्, ‘राजतन्त्र होइन, राजसंस्था पुनर्स्थापनाको आन्दोलनमा हो राप्रपा भन्नेहरूले नेपालगन्जमा बीपीको सालिकमा कालोमोसो दल्ने र तोडफोड गर्ने धृष्टता गरेछन् । अब आफैँ बुझ्नुहोस् राजावादीहरू के चाहन्छन् ? आन्दोलनका संयोजक धवल शमशेरको गृहनगरीबाट दिएको सन्देश हो, कांग्रेसभित्रका संवैधानिक राजसंस्थाका हिमायतीहरूलाई ।

‘त्यसैले नेपालमा लोकतन्त्र र राजसंस्था सँगै जान सक्दछ भन्नेहरूले बुझ्नुपर्दछ पूर्वराजा ज्ञानेन्द्रको शासन बेहोर्नु परेको भए बीपी पनि गणतन्त्रका पक्षमा उभिनुहुन्थ्यो । किनकि बीपीको समयमा बीपीभन्दा बढी नै संवैधानिक राजसंस्थाका हिमायती हुनुहुन्थ्यो गिरिजाप्रसाद कोइराला ।’