देशान्तर मिडिया प्रा. लि
सूचना विभागमा दर्ता नं. : १४७१/०७६–७७
Office: ग्रविटी टावर, अनामनगर - ३२ काठमाडौँ
Phone: +९७७ ०२४-५२०५५५
Admin: radiodeshantar@gmail.com
News: deshantarweekly@yahoo.com

धनगढी एफसीको शानदार सुरुआत

देशान्तर

नेपाल सुपर लिग (एनएसएल) को तेस्रो संस्करणमा साविक विजेता धनगढी एफसीले शानदार सुरुआत गरेको छ ।

मंगलबार त्रिपुरेश्वरस्थित दशरथ रंगशालामा भएको खेलमा धनगढीले बुटवल लुम्बिनी एफसीलाई ४–१ को गोलको फराकिलो अन्तरले पराजित गर्दै आफ्नो पहिलो खेलमा प्रभावशाली जित निकाल्यो ।

धनगढीका लागि अहमद हिजाजीले दुई गोल गरे भने कृतिशरत्न छुन्जु र सर्जियो बार्बोजुले एक एक गोल थपे । बुटवलका लागि केन्टा हाराले एक गोल फर्काए ।

खेलको छैटौँ मिनेटमै हिजाजीले मोहमद अल जाउएनीको लङ पासलाई सदुपयोग गर्दै उत्कृष्ट ‘एक्रोबेटिक’ गोल गरेका थिए । बुटवलका गोलकिपर दीप कार्कीले उनको प्रहार रोक्न सकेनन् ।

३१औँ मिनेटमा केन्टाले ब्याक हिलमार्फत उत्कृष्ट गोल गर्दै बुटवललाई खेलमा फर्काए । तर, ७५औं मिनेटमा कृतिशरत्नले कप्तान देवेन्द्र तामाङको पासलाई सदुपयोग गर्दै गोल गर्दै धनगढीको अग्रता २-१ बनाए ।

इन्जुरी समयको छैटौं मिनेटमा हिजाजीले  व्यक्तिगत दोस्रो गोल गर्दा धनगढी ३-१ ले अघि बढेको थियो । यसैगरी इन्जुरी समयको अन्तिममा ब्राजिलियन खेलाडी सर्जियो बार्बोजुले ब्यक्तिगत पहिलो गोल गर्दा धनगढी जारी सिजनको खेलमा सर्वाधिक फराकिलो ४–१  गोल अन्तरले विजयी भयो ।