काठमाडौं । घरेलु टोली नेपाल त्रिकोणात्मक अन्तर्राष्ट्रिय ट्वान्टी–२० शृंखला अन्तर्गत पहिलो खेलमा नेदरल्यान्ड्ससँग पराजित भएको छ।
बिहीबार सम्पन्न खेलमा नेपाल २० रनले पराजित भएको हो । नेदरल्यान्ड्सले दिएको १५८ रनको लक्ष्य पछ्याएको नेपालले निर्धारित २० ओभरमा सात विकेट गुमाउँदै १३७ रन मात्रै बनाउन सक्यो । जितसँगै नेदरल्यान्ड्सले दुई अंक जोडेको छ ।
नेपालकी ओपनर सीता रानामगरले तीन चौकाको मद्तले सर्वाधिक २८ रन बनाइन् ।

कविता जैशी २७, पूजा महतो २४ रनमा आउट भइन् । बिन्दु रावल तीन र अलियाकुमारी यादव चार रनमा अविजित रहिन् ।
कविता कुँवर, पूजा महतो, ईश्वरी विष्ट र सीता रानामगरले समान एक विकेट लिइन् । नेदरल्यान्ड्सका क्यारोलिन डि ल्याङ्गे र इभा लिन्चले समान दुई विकेट लिइन् । सिल्भर सिजर्स र आइरिस ज्विलिङले एक एक विकेट विकेट लिइन् । आठ चौकाको मद्तले रोबिन रिज्केले सर्वाधिक ५९ रन बनाइन् । स्टेर कालिस २९, हेदर सिगर्स २३ रनमा आउट हुँदा आइरिस ज्विलिङले अविजित ३१ रनको इनिङ्स खेलिन् ।
घरेलु टोलीको इतिहासमा नै पहिलो पटक नेपाली महिला टोलीले नेदरल्याण्ड्सको सामना गरेको थियो । महिला टि ट्वान्टी वरियतामा नेदरल्याण्ड्स १६औंँ स्थानमा रहँदा नेपाल भने २०औं स्थानमा छ ।