सर्लाही । तीव्रगतिमा रहेको यात्रुवाहक बस बलरा नगरपालिका–९, छतौना बोर्डर आउट पोष्ट (बिओपी)मा ड्युटीमा रहेका सशस्त्र प्रहरी निरीक्षक विजयकुमार तुलाधरमाथि बजारिँदा निजको मृत्यु भएको छ ।

गए राति बागमती प्रदेश०१–००६ख २००४ नम्बरको यात्रीबसले तुलाधरलाई थिचेको थियो । बसले थिचेर गम्भीर घाइते भएका निजको उपचारका लागि प्रादेशिक अस्पताल मलंगवा लैजाँदा बाटोमा नै मृत्यु भएको हो ।

सशस्त्र प्रहरी उपरीक्षक विनोदराज खनालका अनुसार प्रहरीले घटनास्थलबाट बसचालकसहित तीनजनालाई पक्राउ गरेको छ ।