काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेलाई आज सोमबार ८औं पटक म्याद थपका लागि अदालतमा उपस्थित गराइएको छ ।

लामिछानेलाई हिरासतमा राख्न पछिल्लो पटक लिएको ५ दिनको म्याद सोमबार सकिएकाले आज उनलाई म्याद थपका लागि जिल्ला अदालत, कास्कीमा उपस्थित गराइएको हो । लामिछाने सहकारी ठगी, संगठित अपराध र सम्पत्ति शुद्धीकरणको कसुरमा अनुसन्धानका लागि कात्तिक ३ गतेदेखि कास्की प्रहरीको हिरासतमा छन् ।

लामिछानेविरुद्ध पुस ५ गते जिल्ला अदालत कास्कीमा अभियोगपत्र दायर गर्नेगरी सरकारी वकिल कार्यालयले तयारी गरिरहेको छ। सम्पत्ति शुद्धीकरण मुद्दामा ९० दिन अनुसन्धान गर्न पाउने भएकाले पुस ५ गते उनीविरुद्ध अभियोग पत्र दायर गर्न लागिएको हो । पछिल्लो दुई महिनामा लामिछानेलाई कास्की, काठमाडौं, चितवन र पर्सा अदातलमा उपस्थित गराएर अनुसन्धान भइरहेको छ ।

आज कास्की प्रहरीले लामिछानेसहित ५ जनालाई म्याद थपका लागि अदालतमा उपस्थित गराएको हो । सूर्यदर्शन सहकारी ठगीका आरोपितहरु लामिछानेसहित ५१ जनालाई सहकारी ठगी, सङ्गठित अपराध र सम्पत्ति शुद्धीकरणको कसुरमा मुद्दा चलाउन कास्की प्रहरीले जिल्ला सरकारी वकिलको कार्यालयमा रायसहितको प्रतिवेदन पेश गरिसकेको छ ।

सूर्यदर्शन सहकारी ठगीमा प्रतिवादी बनाइएका ५१ जनाबाट १ अर्ब ५१ करोड बीगो मागसहित प्रहरीले प्रतिवेदन तयार गरेको छ ।