काठमाडौं । नेपाल प्रिमियर लिग (एनपीएल)मा जनकपुर बोल्ट्सले पोखरा एभेन्जर्स लाई सात विकेटले हराएको छ ।
बिहीबार कीर्तिपुरस्थित त्रिवि क्रिकेट मैदानमा पोखराले दिएकोे १३९ रनको लक्ष्य जनकपुरले १७.१ ओभरमा तीन विकेट गुमाएर पूरा गरेको हो ।
जनकपुरको जितमा लहिरु मिलान्थाले ४५ रन बनाए । उनले ३२ बलमा आठ चौका प्रहार गरे । ओपनर आसिफ सेखले ३४ बलमा तीन चौकासहित ३३ रन बनाए । जिम्मी निसमले २० बलमा अविजित ४० रन बनाए । उनले पाँच छक्का प्रहार गरे । निसमसँगै अविजित रहेका हर्ष थाकेरले १४ बलमा १३ रन बनाए ।

आजको खेलमा ओपनर तथा कप्तान अनिल साह भने एक रनमै आउट भए । जनकपुरविरुद्ध पोखराका बलिङमा विपीन खत्री, माइकल लियस्क र कुशल भुर्तेलले समान एक विकेट लिए । त्यसअघि टस हारेर ब्याटिङमा आएको पोखराले निर्धारित २० ओभरमा सात विकेट गुमाएर १३८ रनको योगफल खडा गरेको थियो । पोखराका मार्कस क्रिटचेलीले सर्वाधिक ३५ रन बनाए । उनले ३० बलमा तीन चौका र एक छक्का प्रहार गरे । माइकल लियस्कले २५ रन बनाए । आन्द्रियस गौसले १६ बलमा तीन चौका र एक छक्कासहित २० रन थपे । ओपनर दीनेश खरेल र दीलिप नाथले क्रमशः १० र ११ रन थपे ।