काठमाडौं । विशेष अदालतले राजस्व स्टिकर छपाइ भ्रष्टाचारमा सुरक्षण मुद्रण केन्द्रका तत्कालीन निर्देशक विकल पौडेल र राष्ट्रिय सूचना प्रविधि केन्द्रका निर्देशक सफल श्रेष्ठबाट झन्डै सात करोड असुल हुने फैसला गरेको छ । 

विशेष अदालतका न्यायाधीशहरू अध्यक्ष टेकनारायण कुँवर तथा सदस्यहरू खुशीप्रसाद थारु र रितेन्द्र थापाको इजलासले पौडेल र श्रेष्ठबाट तीन करोड ४२ लाख २२ हजार ८०० विगो असुल गरी त्यति नै जरिवाना हुने फैसला गरेको हो । उनीहरू दुवैलाई आठ वर्ष कैद हुने फैसला पनि भएको छ । 

गत कात्तिक १४ मा भएको फैसलाअनुसार बिहीबार (आज) विशेष अदालतले सजाय निर्धारण गरेको हो । उक्त मुद्दामा अख्तियारले विपक्षी बनाइएका तत्कालीन मुख्यसचिव बैकुण्ठ अर्यालसहितका प्रतिवादीले भने सफाइ पाएका थिए ।