चितवन । चितवनको नारायणगढ-मुग्लिन सडकखण्डको नौकिलो भन्ने स्थानमा आइतबार बेलुकी ट्रक दुर्घटना भएको छ । दुर्घटनामा दुईजनाको मृत्यु भएको छ भने दुई जना घाइते भएका छन् ।

नारायणगढबाट मुग्लिङतर्फ जाँदै गरेको बागमती प्रदेश ०३-००१ ख ३४९० नम्बरको ट्रक आइतबार बेलुका पौने सात बजेतिर सडककाे किनारमा पल्टिएको हाे । चामल बोकेको ट्रक पल्टिँदा च्यापिएका मकवानपुरको मकवानपुरगढी गाउँपालिका-६ का ३८ वर्षीय श्याम बजगाईं र सोही ठाउँका ३१ वर्षीय दीपक दाहालको मृत्यु भएको प्रहरीले जनाएको छ ।

उनीहरु दुवैजनाको भरतपुर अस्पतालमा उपचारको क्रममा मृत्यु भएको हो । दुर्घटनामा घाइते भएका दुई जनाको सोही अस्पतालमा उपचार जारी छ । दुर्घटनापछि फरार ट्रक चालक दिनेश पुडासैनीलाई प्रहरीले पक्राउ गरेको छ ।

गत शनिबार चितवनको चित्रवन स्कुलका विद्यार्थीहरु सवार बस दुर्घटना हुँदा घाइते भएकाहरुमध्ये एकजनाको पनि उपचारका क्रममा आज मृत्यु भएको छ ।

मृत्यु हुनेमा मृत्यु हुनेमा कालिका नगरपालिका-३ का सावित्री पोखरेलका ८ वर्षीय छोरा आरम्भ पोखरेल छन् ।