ओखलढुंगाको जिल्ला समन्वय समितिको प्रमुखमा टेकराज भट्टराई निर्विरोध निर्वाचित भएका छन् ।

स्थानीयतहको उप निर्वाचन अन्तर्गत आइतबार उम्मेदवारी दर्ता गर्ने दिन कांग्रेसका भट्टराईको मात्रै उम्मेदवारी दर्ता भए पछि उनी निर्विरोध निर्वाचित भएका हुन् । उनी २०७९ को चुनावमा वडा सदस्यको रुपमा निर्वाचित भएका थिए । जिल्लामा कांग्रेस एक्लैको ९ र अन्य विपक्षीहरुको ७ मत रहेकाले औपचारिकता मात्रै बाँकी रहेको थियो ।

यसैगरी ओलखढुंगाको मोलुङ गाउँपालिका वडा नम्बर ५ मा भने वडाध्यक्षका लागि चुनाव हुँदै छ ।

जिसस प्रमुखमा भट्टराई निर्विरोध निर्वाचित भएपछि नेपाली कांग्रेस केन्द्रीय कार्यालयले विज्ञप्ति जारी गरेर निर्विरोध निर्वाचित गराउन अहं भूमिका निर्वाह गरेका अन्य राजनीतिक दल एवं सम्पूर्ण जनप्रतिनिधिहरुलाई धन्यवाद पनि ज्ञापन गरेको छ ।
अमाशयको क्यान्सरबाट पीडित तत्कालिन जिसस प्रमुख डिल्लीराम खनालको गत बर्ष निधन भएको थियो । उनको निधन पछि निर्वाचन आयोगले उप निर्वाचन गराउन लागेको हो ।

१६ गते देशका विभिन्न ठाउँमा उप निर्वाचन हुँदै छ । त्यसअन्तर्गत आइतबार उम्मेदवारी दर्ताको समय रहेको थियो ।