काठमाडौं । कलाकार सुरज चापागाईं ‘बान्द्रे’को लेखन निर्देशन तयार भएको नयाँ वेब सिरिज ‘मेरी आम्मै’ सार्वजनिक भएको छ । प्रत्येक शनिबार बेलुका साढे ७ बजे ‘बान्द्रे नारायण’बाट स्ट्रिमिङ भइरहेको सिरिजको पहिलो भाग कात्तिक १७ गते प्रसारण भएको थियो । हिजो शनिवार यसको दोस्रो भाग सार्वजनिक भएको छ ।

यसअघि ‘हल्का रमाइलो’, ‘मेरी बास्सै’, ‘गाह्रो छ’ जस्ता टीभी शृंखलामा देखिएका उनी केही समय दर्शकबाट टाढिएका थिए । ‘मेरी आम्मै’बाट उनले सक्रिय कलाकारितालाई अघि बढाउने जनाएका छन् । यस शृंखलामा उनीसहित ‘मेरी बास्सै’की कलाकार सुनिता गौतम ‘मैयाँ’, सहित कलाकार सुशील पोखरेल, यादव देवकोटा ‘सरापे’, रमेश बुढाथोकी, मुस्कान लामा, रमेश बुढामगर, सूर्य श्रेष्ठको अभिनय देख्न सकिन्छ । सूर्य श्रेष्ठले निर्माण गरेको ‘मेरी आम्मै’को शीर्ष गीतमा शिव परियारको स्वर योगेशकाजीको संगीत रहेको छ । शीर्ष गीतको शब्द प्रसिद्ध गीतकार लोकराज अधिकारीले लेखेका हुन् ।