धनकुटा, २४ असोज
कोशी प्रदेशका भौतिक पूर्वाधार विकास मन्त्री तथा नेपाली कांग्रेसका प्रदेश महामन्त्री भूपेन्द्र राईसँग धनकुटामा नेपाली कांग्रेसका नेता तथा कार्यकर्ताहरूले बाढी पहिरो पीडितहरूको राहत र पुनर्निर्माणको माग गर्दै छलफल गरेका छन्।

नेपाली कांग्रेस धनकुटाका जिल्ला सभापति दिनेश राई, संविधानसभा सदस्य लिला सुब्बा, जिल्ला सचिव विजय सन्तोषी राई लगायतको टोलीले मन्त्री राईलाई भेटेर धनकुटामा हालैको बाढी पहिरोबाट मृत्यु भएका परिवारहरूलाई तत्काल राहत र क्षतिपूर्ति उपलब्ध गराउन आग्रह गरेका छन्। यस अवसरमा धनकुटाको समृद्धि र विकासका लागि विशेष योजनाहरू पनि अगाडि सार्न आग्रह गरिएको थियो।

मन्त्री राईले बाढी पहिरोबाट प्रभावित परिवारहरूलाई क्षतिपूर्ति वितरण कार्य अघि बढिसकेको र भौतिक संरचनाहरूको पुनर्निर्माण तीव्र गतिमा भइरहेको जानकारी दिए। साथै, धनकुटाको विकासमा प्रदेश सरकारले विशेष ध्यान दिने प्रतिवद्धता व्यक्त गरे।

छलफलमा नेपाल ट्रेड युनियन कांग्रेसका केन्द्रिय सदस्य विगेन्द्र याक्खा, नेपाल शिक्षक संघका संघीय प्रतिनिधि विनय राई, समाजसेवी खेम आर्चाय, र नेपाल पत्रकार महासंघ धनकुटाका उपाध्यक्ष विदुर खवासलगायतका स्थानीय नेताहरूको उपस्थिति रहेको थियो।

धनकुटाको विकास र समृद्धिको योजनामा सरकारको पहललाई जनप्रतिनिधिहरूले बलियो साथ दिने आशा व्यक्त गर्दै, भविष्यमा थप ठोस कार्ययोजना अघि बढाइने बताइएको छ।