काठमाडौं । करातेकी एरिका गुरुङ र क्रिकेटका रोहितकुमार पौडेल एनएसजेएफ पल्सर स्पोर्ट्स अवार्ड २०८० को वर्ष खेलाडी घोषित भएका छन् । नेपाल खेलकुद पत्रकार मञ्च (एनएसजेएफ) द्वारा शुक्रबार आयोजित कार्यक्रमका क्रममा एरिका महिलामा र रोहित पुरुषमा वर्ष उत्कृष्ट खेलाडी घोषित भएका हुन् । नेपाल प्रज्ञा प्रतिष्ठानमा सम्पन्न अवार्ड समारोहमा १९औं एसियाली खेलकुदमा रजत पदक विजेता एरिकाले फुटबलकी साबित्रा भण्डारी, क्रिकेटकी रुबिना क्षेत्री, एथलेटिक्सकी सन्तोषी श्रेष्ठ र कबड्डीकी मेनुका राजवंशीलाई पछि पारिन् । पुरुषतर्फ, क्रिकेटका रोहितले क्रिकेटकै दीपेन्द्रसिंह ऐरी, करातेका मोहम्मद सेखु आलम, फुटबलका अनन्त तामाङ र गल्फका सुवास तामाङलाई पछाडि पार्दै यो अवार्ड जितेका हुन् ।

यसपल्टको अवार्डमा शीर्ष तीनको मनोनयनबाट विजेता घोषणा गरिएको छैन, बरु शीर्ष पाँचको मनोनयन समावेश गरिएको छ । एरिकालाई युवा तथा खेलकुद मन्त्री तेजुलाल चौधरीले अवार्ड प्रदान गरे । वर्ष उत्कृष्ट खेलाडीद्वय एरिका र रोहितले पल्सर एनएस २०० मोटरबाइक प्राप्त गरेका छन् ।

भलिबलकी कविता भट्टले पिपुल्स च्वाइस अवार्ड जितिन् । कविता यस्ता मान्यता प्राप्त गर्न ईसेवाको भोटिङ, मञ्चका सदस्यहरूको मत, फेसबुक लाइक र प्रमुख प्रशिक्षकहरूको मतका आधारमा चयन भएकी हुन् । कविता ले ५६ प्रतिशत मत प्राप्त गरिन् । पिपुल्स च्वाइस विजेता कविताले पल्सर एनएस ४०० मोटर बाइक जितिन् । उनलाई नेपाल ओलम्पिक कमिटीका अध्यक्ष जीवनराम श्रेष्ठले अवार्ड प्रदान गरे ।
वर्ष उत्कृष्ट प्रशिक्षक करातेका कुशल श्रेष्ठ घोषित भए । कुशलले पनि पल्सर एनएस २०० मोटरबाइक पाए । उनलाई प्लाजा ग्रुप अफ होटल्सका प्रबन्ध निर्देशक युवराज श्रेष्ठले अवार्ड प्रदान गरे । कुशलको प्रशिक्षणमा नेपालले १९औं एसियाली खेलकुदमा एक कांस्य र दशौं विश्व कराते च्याम्पियनसिप इन्डोनेसियामा (एक स्वर्ण, तीन रजत र पाँच कांस्य) पदक प्राप्त गरेको थियो ।
प्रशिक्षक कुशलले कविराज नेगी लामा (पारा तेक्वान्दो), मोन्टी देसाई (क्रिकेट), पार्वती राई (कबड्डी) र सञ्जय मर्हजन (भारोत्तोलन) लाई पछि पारे । युवा वर्ष खेलाडी भारोत्तोलनका हेमन्त पाल घोषित भए । हेमन्तले अवार्डसँगै पल्सर एनएस २०० मोटरसाइकल पुरस्कार प्राप्त गरे । उनलाई बागमती प्रदेशका युवा तथा खेलकुदमन्त्री मीनकृष्ण महर्जनले अवार्ड प्रदान गरे ।

हेमन्तले अर्जुन कुमाल (क्रिकेट), प्रीति राई (फुटबल), सुजन गडाल (टेबलटेनिस) र सुनिरा थापा (टेनिस) लाई पछाडि पार्दै यो अवार्ड जिते । १६ वर्षीय हेमन्त पाल भारतको नोयडामा भएको एसियन जुनियर भारोत्तोलन च्याम्पियनसिपमा तीन कांस्य विजेता छन् । उनले नेपाली भारोत्तोलनलाई ३८ वर्षपछि एसियालीस्तरमा पदक दिलाएका छन् ।
एनएसजेएफ पारा एथ्लिट अवार्डबाट पलेशा गोवर्धन सम्मानित भइन् । पलेशा चौथो पारा एसियन गेम्समा नेपालका लागि पहिलोपल्ट कांस्य पदक दिलाउन सफल खेलाडी हुन् ।
लाइफ टाइम अचिभमेन्ट अवार्ड नेपाल क्रिकेट संघ (क्यान) पूर्वअध्यक्ष विनयराज पाण्डेले प्राप्त गरे । पाण्डेलाई नेपाल खेलकुद पत्रकार मञ्चका अध्यक्ष दुर्गानाथ सुबेदी र महासचिव प्रज्वल ओलीले अवार्ड प्रदान गरे ।
स्पेशल अवार्डबाट भलिबलका प्रशिक्षक कुमार राई सम्मानित भए । उनी दुई दशकभन्दा बढी समय भलिबलको प्रशिक्षणमा सक्रिय छन् । प्रशिक्षक राईलाई एआइपिएस एसियाका अध्यक्ष ही डोङ जङले अवार्ड प्रदान गरे ।

१९औं एसियाली खेलकुदमा नेपाललाई कांस्य पदक दिलाउन सफल महिला कबड्डी टोलीले टिम अफ दी इयरको अवार्ड प्राप्त गर्यो । नेपाल जुडो संघका अध्यक्ष दीपक हर्ष ब्रजाचार्यले यो टोलीलाई अवार्ड प्रदान गरे ।
लाइफ टाइम अचिभमेन्ट अवार्ड, स्पेशल अवार्ड र पारा एथ्लेटको अवार्डसँगै जनही एक लाख रुपैयाँ पुरस्कार प्राप्त गरे । एसियन स्पोर्ट्स जर्नालिस्ट अवार्ड एआइपिएस एसियाका अध्यक्ष हि डोङ जङलाई प्रदान गरिएको छ । सूर्य नेपाल प्रालीका ब्रान्ड म्यानेजरले दक्षिण कोरियाली पत्रकार ही डोङलाई अवार्ड प्रदान गरे ।
कुल १० विधामध्ये एसियन स्पोर्ट्स जर्नालिस्ट अवार्ड विजेताबाहेक ८ विधाका विजेता युनाइटेड अजोड इन्स्योरेन्सको तर्पmबाट एक वर्षका लागि खेलकुद विमा पाउनेछन् ।
यसै कार्यक्रममा नेपाल खेलकुद पत्रकार मञ्च (एनएसजेएफ) का अध्यक्ष दुर्गानाथ सुबेदीसहित ६ देशका पत्रकारले एआइपिएस एसिया लिजेन्ड्स अवार्ड प्राप्त गरे । युएईका अब्दुला इब्राहिम, मलेसियाका अहमद खवारी इसा, भारतका सबा नायकन, साउदी अरेबियाका सालेह अब्दुल अजिज र बंगलादेशका महमुद हुसेन खानले यो अवार्ड पाएका हुन् ।
बागमती प्रदेशका सदस्यसचिव दीपक लामा, केल्मी नेपालका प्रबन्ध निर्देशक उत्तम न्यौपाने, चन्द्रागिरी हिल्सका सेल्स एन्ड मार्केटिङ निर्देशक प्रभावकर खड्का र एआइपिएसका उपाध्यक्ष यानिस दारासले एआइपिएस एसिया लिजेन्ड्स अवार्ड विजेतालाई सम्मान गरेका थिए ।

२१औं संस्करणको पल्सर अवार्डको मुख्य प्रायोजक हंशराज हुलासचन्द एन्ड कम्पनी प्रालि रहेको छ । सदाझै यस वर्ष पनि पल्सर स्पोर्ट्स अवार्डको मुख्य प्रायोजक गोल्छा ग्रुपको पल्सर मोटरसाइकल हो । गोल्छा ग्रुपको नाम यसअघि हंशराज हुलास चन्द एन्ड कम्पनी रहेको थियो । मञ्च र गोल्छा ग्रुपबीच अवार्डकै लागि सहकार्य भएको यो १६औं वर्ष हो ।
सह–प्रायोजक र सहयोगीमा सूर्य नेपाल प्रालि, ई–सेवा, केल्मी नेपाल, युनाइटेड अजोड इन्स्योरेन्स, रोयल सिंगी होटल, प्लाजा ग्रुप अफ होटल्स, इमेजिङ, न्यु होराइजन कार्पेट, हिमालय होटल, चन्द्रागिरी हिल्स, राष्ट्रिय खेलकुद परिषद् (राखेप), नेपाल ओलम्पिक कमिटी (एनओसी), होटल संघ नेपाललगायत रहेका छन् ।