काठमाडौं । प्रतिनिधिसभाअन्तर्गतको अन्तर्राष्ट्रिय सम्बन्ध र पर्यटन समितिले प्यालेस्टाइनी लडाकु समूह हमासको बन्धनमा रहेका नेपाली विद्यार्थी विपीन जोशीको बिनासर्त रिहाइका निम्ति अन्तर्राष्ट्रिय समुदायसँग आग्रह गर्ने निर्णय गरेको छ । बिहीबार सिंहदरबारमा बसेको सो समितिको बैठकबाट त्यस्तो आग्रह गर्ने निर्णय गरिएको हो ।

बैठकपछि निर्णय सुनाउँदै समितिका सभापति राजकिशोर यादवले जोशीको बिनासर्त अविलम्ब रिहाइका निम्ति हमासलगायत अन्तर्राष्ट्रिय शक्तिसँग आग्रह गर्ने निर्णय गरिएको बताए ।

बैठकबाट समितिको ६ महिनाको भावी कार्ययोजना र कार्य प्राथमिकीकरणका निम्ति नौ सदस्यीय कार्यदल गठन गरिएको पनि उनले जानकारी दिए ।