काठमाडौं । भुटानलाई हराउँदै पाकिस्तान यू–१९ साफ च्याम्पियनसिपको फाइनलमा प्रवेश गरेको छ ।

बुधबार दशरथ रंगशालामा भएको खेलमा भुटानलाई सडनडेथमा हराउँदै पाकिस्तान फाइनल पुगेको हो । सडनडेथमा पाकिस्तानका कमिल अहमद खान गोल गर्दै पाकिस्तानलाई फाइनलको यात्रा तय गराए । 

निर्धारित ९० मिनेटको समय गोल रहित बराबरीमा सकिएपछि निर्णय पेनाल्टी सुटआउटबाट गरिएको थियो । पेनाल्टी सुटआउटमा समेत दुवै टोलीबाट समान ५ गोल भएपछि निर्णय पेनाल्टी सुटआउटमा गरिएको थियो ।पाकिस्तान समूह एको विजेताको रुपमा सेमिफाइनल प्रवेश गरेको थियो । सेमिफाइनलमा दुवै टोलीले खासै गोलको अवसर सिर्जना गर्न सकेनन् । समूह चरणको खेलमा पाकिस्तानले नेपाललाई हराएको थियो ।

लामो समयको प्रतिबन्धबाट फुटबलमा फर्किएको पाकिस्तानले उमेर समूहको फुटबलमा राम्रो नतिजा पस्किएको छ । साफ क्षेत्रको उमेर समूहको प्रतियोगितामा पाकिस्तान पहिलो पटक फाइनल पुगेको हो । पहिलो पटक साफ यू–१९ को फाइनल पुगेको पाकिस्तानले उपाधिका लागि भारत र नेपालबीचको विजेतासँग खेल्नेछ ।