काठमाडौं । भुटानमा जारी साफ यू–१६ च्याम्पियनसिप अन्तर्गत समूह ए को अन्तिम खेलमा नेपाल भारतसँग १–० ले पराजित भएको छ । यो हार संगै नेपाल प्रतियोगिताबाट बाहिरिएको छ ।

साविक उपविजेता समेत रहेको नेपाल लगातार दुई खेलमा हार बेहोर्दै समूह चरणबाटै बाहिरिएको हो । यसअघि पहिलो खेलमा पनि नेपाल बंगलादेशसँग १–० ले नै पराजित भएको थियो ।
बुधबार भएको खेलमा भारतका लागि मोहम्मद अर्सादले ३३औं मिनेटमा गोल गर्दै अग्रता दिलाएका थिए । त्यसपछि नेपालले बराबरी गोल फर्काउने प्रयास गरे पनि सफल हुन सकेन । भारत लगातार दुई खेल जित्दै समूह ए को विजेताको रुपमा सेमिफाइनल प्रवेश गरेको छ । भारतसँग नेपाल पराजित भएपछि एक जित र एक हारको नतिजा निकालेको बंगलादेश समूह उपविजेता बन्दै सेमिफाइनल पुगेको छ ।
समूह बी बाट पाकिस्तान यसअघि नै लगातार दुई खेल जित्दै सेमिफाइनल पुगिसकेको छ । अब भुटान र माल्दिभ्सबीच हुने खेलबाट सेमिफाइनल पुग्ने अन्तिम टोलीको टुङ्गो लाग्नेछ ।