नेपाल सशस्त्र प्रहरी बलको आयोजनामा प्रथम महानिरीक्षक कृष्णमोहन श्रेष्ठको स्मृतिमा आयोजना हुने राष्ट्रव्यापी खुला ब्याडमिन्टन प्रतियोगिताको १६ औं संस्करण जेठ २१ देखि २४ गते सम्म हुने भएको छ ।

नेपाल एपीएफ क्लब कृष्णमोहन स्मृति भवन हलचोकमा आयोजना हुने प्रतियोगिताका बारेमा आज पत्रकार सम्मेलन गर्दै सशस्त्र प्रहरी बलका प्रवक्ता बरिष्ठ उपरीक्षक राजेन्द्र खड्काले उक्त जानकारी गराएका हुन् ।

राष्ट्रिय वरियता प्रतियोगिता समेत रहेको प्रतियोगितामा पुरुष/ महिला एकल र युगल, मिक्स युगल, पुरुष यु–१२ र यु–१९, भेट्रान्स युगल ४५ र ५५ बर्ष माथि तथा अन्तर सरकारी सेवा (बहाल तथा निबृत्त) ३५ बर्ष माथि गरि १० विधामा प्रतिस्पर्धा हुनेछ ।

कुल ८ लाख, ६५ हजार पुरस्कार रासी रहेको प्रतियोगितामा पुरुष र महिला एकलका विजयी शीर्ष तीनका खेलाडीहरूले नगद ७० हजार, ३५ हजार र २५ हजार प्राप्त गर्ने छन् । यसतै युगल तर्फ पहिलो हुनेले नगद ५५ हजार, दोश्रो हुनेले नगद ३० हजार र तेश्रो हुनेले नगद २० हजार प्राप्त  गर्नेछन् । यस्तै ब्वाइज १२ र १९ वर्ष मुनिका शीर्ष तीन स्थान प्राप्त गर्ने खेलाडीहरूले नगद २५ हजार, १५ हजार र १० हजार प्राप्त गर्नेछन् ।

मिस्क युगल तर्फ प्रथमले ५० हजार, दोश्रोले ३० हजार र तेश्रोले २० हजार प्राप्त गर्नेछन् । भेट्रान्स तर्फका दुवै समूह र अन्तर सरकारी सेवाका शीर्ष तीन स्थान प्राप्त गर्ने खेलाडीहरूले प्रथम हुनेले नगद ३० हजार, दोश्रो हुनेले २० हजार र तेश्रो हुनेले १५ हजार नगद प्राप्त गर्नेछन् । यसका साथै मेडल, ट्रफी र प्रमाण पत्र प्राप्त गर्नेछन् ।

कार्यक्रमलाई फर्मुला प्लस ईभेन्ट एवं एडभर्टाईजिङ्ग प्रा.लि., नेपाल ब्याडमिन्टन संघ (प्राविधिक सहयोग), बागमती प्रदेश, योनेक्स सनराइज नेपाल, एपीएफ मेम्बर्स सोसाइटी समन्वय र सहकार्य गर्ने समेत पत्रकार सम्मेलनमा जानकारी गराइयो ।

साथै पत्रकार सम्मेलनमा १२ औं सहवीर स्मृति खुला राष्ट्रिय लन टेनिस प्रतियोगिता संघ सँग समन्वय गरि भदौमा सञ्चालन गरिने समेत पत्रकार सम्मेलनमा बताइयो ।