काठमाडौं–  नेकपा एमालेका अध्यक्ष केपी शर्मा ओलीले प्रधानमन्त्री पुष्पकमल दाहाल प्रचण्डमाथि विश्वास नभएको बताएका छन् । सोमबार नयाँ बानेश्वरमा बसेको संसदीय दलको बैठकलाई सम्बोधन गर्दै अध्यक्ष ओलीले आफूहरूले प्रधानमन्त्री बनाए पनि प्रचण्डले इमान छोडेको बताएका हुन् ।

उनले प्रधानमन्त्री प्रचण्डमाथि विश्वास नभएको भन्दै विश्वासको मत दिन नसक्ने बताएका छन् ।

प्रधानमन्त्री प्रचण्डलाई विश्वास भए गठबन्धनका स्वार्थीहरूले भोट दिने ओलीले बताए । ‘प्रधानमन्त्रीजीमाथि विश्वास छ भने गठबन्धनका स्वार्थीहरूले भोट देलान् । हामीलाई कुनै स्वार्थ छैन। झुक्नु छैन् । लतारिनु पनि छैन । उहाँमाथि विश्वास छ भन्ने कुरामा हामी लतारिनुपर्दैन,’ उनले भने, ‘हामीलाई उहाँमाथि विश्वास छैन । तसर्थ हामी उहाँलाई विश्वासको मत दिँदैनौँ ।’