काठमाडौं– नागरिक उन्मुक्ति पार्टीले अध्यक्षसमेत रहेकी प्रतिनिधिसभा सदस्य रञ्जिता श्रेष्ठ चौधरीलाई उपराष्ट्रपतिको उम्मदेवार बनाउने निर्णय गरेको छ । शुक्रबार बिहान सिंहदरबारमा बसेको संसदीय दलको बैठकले अध्यक्ष चौधरीलाई उपराष्ट्रपतिको उम्मेदवार बनाउने निर्णय गरेको प्रमुख सचेतक गंगाराम चौधरीले जानकारी दिए ।

बैठकको निर्णयबारे जानकारी दिँदै उनले भने, ‘आज बिहान बसेको संसदीय दलको बैठकले अध्यक्षज्यूलाई उपराष्ट्रपतिको उम्मेदवार बनाउने निर्णय गरेको छ । हामीले अहिले पार्टीले निर्णय गरेका हौँ । अब गठबन्धनमा छलफल गर्छौं ।’

सत्ता गठबन्धनमै रहेको जनता समाजवादी पार्टीले बाराका सांसद रामसहाय प्रसाद यादवलाई उपराष्ट्रपति बनाउने निर्णय गरेको छ । तर उपराष्ट्रपतिमा नागरिक उन्मुक्ति पार्टीले पनि उम्मेदवार उठाउने भएपछि भने यो उम्मेदवार छनोट पेचिलो बनेको छ ।