काठमाडाैं – दक्षिण कोरियामा कोरोना भाइरसबाट थप ४३ हजार संक्रमित भएका छन्। सरकारी अधिकारीहरुले सोमबार दिएको जानकारीअनुसार पछिल्लो एक दिनमा ४३ हजार एक सय ४२ जना संक्रमित भएका हुन्।

यो सँगै दक्षिण कोरियामा कोरोना भाइरसबाट अहिले संक्रमित भएकाहरुको कुल सङ्ख्या दुई करोड तीस लाख २६ हजार नौ सय ६० पुगेको छ। केही दिनअघिसम्म दैनिक एक लाखभन्दा बढी संक्रमित हुने गरेकोमा अहिले घटेर एक लाखभन्दा धेरै कम भएको छ।

अघिल्लो हप्ता पनि औसतमा दैनिक एक लाख चार हजार नयाँ संक्रमित हुने गरेको स्वास्थ्य अधिकारीहरुले जनाएका छन्। अहिले संक्रमित अवस्थामै रहेका मध्ये पाँच सय ९७ जना गम्भीर अवस्थामा रहेका छन्। ती मध्ये १६ जना पछिल्लो एक दिनमा थपिएका हुन्।

पछिल्लो २४ घण्टामा कोरोनाका कारण ४९ जनाको मृत्यु भएको छ। यो सँगै दक्षिण कोरियामा कोरोनाका कारण अहिलेसम्म २६ हजार छ सय १८ जनाको मृत्यु भएको छ।