काठमाडौँ – रुस र युक्रेनले युद्धका क्रममा मृत्यु भएका ३ सय २० जना सैनिकको शव परिवारलाई बुझाएका छन् ।

युक्रेनको मारियापोल सहरमा रुसी सेनाको आक्रमणमा परेर मृत्यु भएका १ सय ६० युक्रेनी सेनाको शव युक्रेनको राजधानी किएभमा ल्याएर रुसले परिवारलाई बुझाएको बीबीसीले जनाएको छ ।

त्यसैगरी युक्रेनले पनि युद्धमा मृत्यु भएका १ सय ६० जनाको शव रुसलाई बुझाएको छ ।

रुसले गएको २४ फेब्रुअरीदेखि युक्रेनमा लगातार आक्रमण गर्दै आएको छ । रुसको आक्रमणको युक्रेनले प्रतिकार गरिरहेको छ । युक्रेनी राष्ट्रपति भोलोदिमिर जेलेन्स्कीले आफ्ना केही सैनिक रुसी सेनाको कब्जामा रहेका र उनीहरुको रिहाइका लागि प्रयास भइरहेको बताए ।