देशान्तर मिडिया प्रा. लि
सूचना विभागमा दर्ता नं. : १४७१/०७६–७७
Office: ग्रविटी टावर, अनामनगर - ३२ काठमाडौँ
Phone: +९७७ ०२४-५२०५५५
Admin: [email protected]
News: [email protected]

नेपालले मरिससलाई हरायो

देशान्तर

काठमाण्डौँ – विमल घर्तीमगरले दोस्रो हाफमा गोल गरेपछि अन्तर्राष्ट्रिय मैत्रीपूर्ण फुटबल खेलमा नेपालले मौरिससलाइ पराजित गरेको छ ।

दशरथ रंगशालामा विमलले ५५औं मिनेटमा गोल गरेका हुन् । उनले १८ यार्ड क्षेत्रबाट सानदार गोल गरे ।
दुई वर्षपछि राष्ट्रिय टोलीमा पुनरागमन गरेका विमलले दशौं अन्तर्राष्ट्रिय गोल गरेका हुन् ।

सन् २०१३ मा नेपालमै भएको साफ च्याम्पियनसिपमा पाकिस्तानविरुद्ध पहिलो अन्तर्राष्ट्रिय गोल गरेका विमल सन् २०१९ को नोभेम्बरमा विश्वकप छनौट अन्तर्गत जोर्डनसँगको खेलयता राष्ट्रिय टोलीमा परेका थिएनन् ।

सुरुमा अनुसासनको कारबाहीमा परेका उनी गत वर्ष राष्ट्रिय टोलीको क्याम्पमै चोटग्रष्त बनेका थिए । उनको उपचार अखिल नेपाल फुटबल संघ एन्फाले कतारमा गरेको थियो ।

पहिलो हाफको तुलनामा दोस्रो हाफमा सुधारिएको प्रदर्शन गरेको नेपालले गोलका राम्रा केहि अवसर खेर फालेको थियो ।

७५औं मिनेटमा बायाँ कर्नरनजिकैबाट सब्स्टिच्युड जगजीत श्रेष्ठले गरेको फ्रिकिक प्रहारमा अन्जन विष्टको हेडर क्रसबारमा लागेर फर्कियो ।

त्यसको तीन मिनेटपछि नेपालले एकैपल्ट गोलका दुई अवसरमा चुक्न पुग्यो । अन्जनले १८ यार्ड बक्सबाट गरेको प्रहार पोलमा लागेर फर्किँदा रिवाउन्ड बलमा जगजीतको हेडर मौरिससका गोलरक्षक केभिन जीन लुइसले पन्च गरेर बचाए ।

यसअघि पहिलो हाफमा खेल सुरु भएको दोस्रो मिनेटमै नेपालले अग्रता लिने अवसर गुमाएको थियो । १८ यार्ड बक्सको ठीक बाहिरबाट सुनील बलको फ्रिकिक प्रहार डिफ्लेक्ट हुँदै पोल नजिकैबाट बाहिरिएको थियो । मौरिससका फर्नान्डो ज्याक्सनले सुनीललाइ नै फल गरेपछि नेपालले राम्रो स्थानबाट फ्रिकिक पाएको थियो ।

३१औं मिनेटमा सुमन लामाले करिव २५ यार्डबाट गरेको प्रहारले पनि पोष्टको दिशा लिन सकेन । ३४ औं मिनेटमा मौरिससले गोलको एउटा अवसर बनाएको थियो । फर्नान्डोको पासमा एड्रियन फ्रान्कोइसले ६ यार्ड बक्सबाट गरेको प्रहार नेपाली गोलरक्षक किरण चेम्जोङले बचाउ गरेका थिए ।

४१औं मिनेटमा सुनील बलको क्रसमा देवेन्द्र तामाङले पेनाल्टी क्षेत्रबाट हेड गरे पनि हुन सकेन । पहिलो हाफको अन्तिम मिनेटमा अन्जन विष्टले वान भर्सेस वानको अवसर सदुपयोग गर्न नसक्दा नेपालले अग्रता बनाउन चुक्यो ।

दोस्रो हाफमा सुरुमै मौरिससले पनि गोलको एउटा सुनौलो अवसर सृजना गरेको थियो । फर्नान्डो ज्याक्सनको लेफ्ट फुटेट प्रहार पोलमा लागेर फर्किँदा गौतम श्रेष्ठले क्लियर गरिदिएका थिए ।

दुई टनेलीबीचको दोस्रो अन्तर्राष्ट्रिय मैत्रीपूर्ण खेल १८ गते हुनेछ ।