काठमाडौं । सरकारले ६ महिनाअघि तीन सडक डिभिजन कार्यालय खारेज गर्ने निर्णय उल्टाएको छ । गत सोमबार बसेको मन्त्रिपरिषदको बैठकले अघिल्लो सरकारले खारेज गरेका ललितपुर, सिन्धुलीको खुर्कोट र प्युठान सडक डिभिजन कार्यालय पुनःस्थापना गर्ने निर्णय गरेको हो ।

तत्कालीन समयमा खर्च कम गर्न तथा आवश्यकता नभएको भन्दै तीन सडक डिभिजन कार्यालय खारेज गर्ने निर्णय गरिएको थियो । खारेजीपछि ती डिभिजन कार्यालयको क्षेत्राधिकार अन्तर्गतका ६ जिल्लामा सडक निर्माणको काम ठप्प भएको र अन्य डिभिजन कार्यालयले जिम्मेवारी नलिएपछि पुनःस्थापना गर्ने निर्णय गरिएको भौतिक पूर्वाधार तथा यातायात मन्त्रालयका प्रवक्ता ललिजन खनालले जानकारी दिनुभयो ।

डिभिजन कार्यालय खारेज भएपछि विभिन्न ६ जिल्लामा सडक निर्माण, स्तरोन्नती तथा मर्मतको काम ठप्प भएको खनालको भनाइ छ । खारेजमा पर्ने डिभिजन कार्यालयमध्ये ललितपुर कार्यालय अन्तर्गतको ललितपुर जिल्ला, प्युठान डिभिजन कार्यालय अन्तर्गतका रोल्पा, दाङ र प्युठान तथा खुर्कोट डिभिजन कार्यालयअन्तर्गत सिन्धुली, रामेछापमा सडक निर्माण सम्बन्धी सम्पूर्ण काम ठप्प भएको बताइएको छ ।

यी जिल्लाहरुमा चालु आर्थिक वर्षको बजेटमा सडक विकास पूर्वाधार अन्तर्गत ६३ सडक निर्माण योजनाका लागि छुट्याइएको १५ करोड १२ लाख रुपैयाँ बराबरको बजेट खर्च भएको छैन ।

मुलुक संघीयतामा गएपछि खर्च घटाउने र संघमा धेरै निकाय आवश्यक नपर्ने भन्दै तत्कालीन ओली नेतृत्वको सरकारले २०७८ असार अन्तिममा सडक डिभिजन कार्यालय ललितपुर, खुर्कोट र प्युठान खारेज गरेको थियो ।