बंगलादेशमा जारी एभिसी सेन्ट्रल जोन भलिबल च्याम्पियनसिप अन्तर्गत महिलातर्फको फाइनलमा आज नेपाल र उज्वेकिस्तानबीच प्रतिस्पर्धा हुँदैछ ।

प्रतियोगितामा समुह चरणका सबै ५ खेल जितेको नेपाल लगातार दोस्रो वर्ष उपाधि जित्ने अभियानमा रहेको छ । समुह चरणको अन्तिम खेलमा नेपालले सोमबार कीर्गिस्तानलाई ३–० को सोझो सेटमा पराजित गरेको थयो । पहिलो सेट २५–८ ले जितेको नेपालले त्यसपछिका दुई सेट २५–१४ र २५–१६ ले आफ्नो पक्षमा पार्दै खेल जित्न सफल भयो ।

समुहमा सबै खेल जितेको नेपालले आज उज्वेकिस्तानलाई पनि सहजै हराएर उपाधि रक्षा गर्ने अनुमान गरिएको छ । लिग चरणको खेलमा नेपालले उज्वेकिस्तानलाई ३–० को सोझो सेटमा हराएको थियो ।

सोमबार नै भएको अर्को खेलमा श्रीलंकामाथि ३–२ को रोमाञ्चक जित निकाल्दै उज्वेकिस्तानले फाइनलमा स्थान बनाएको थियो ।
लिग चरणमा अपराजित रहेको नेपालले ५ खेलबाट १४ अंक जोड्यो । दोस्रो स्थानमा रहेको उज्वेकिस्तानले ११ अंक जोड्यो ।

समान ११ अंक नै रहेपनि सेटमा श्रीलंका पछि परेको थियो । किर्गिस्तानले ६ अंक जोड्यो । माल्दिभ्स र बंगलादेशले अंकको खाता नै खोल्न सकेनन् ।