विभागीय टिम नेपाल पुलिस क्लबले शहिद स्मारक ‘ए’ डिभिजन लिग फुटबलमा पहिलो जित निकालेको छ । त्रिपुरेश्वरस्थित दशरथ रंगशालामा आईतबार जावलाखेल युथ क्लबलाई १–० गोल अन्तरले पराजित गर्दै पुलिसले पहिलो जित निकालेको हो ।

पुलिसलाई जित दिलाउन सुमन लामाले निर्णायक गोल गरे । रोमान्चक बनेको खेलको पहिलो हाफ गोलरहित बराबरीमा सकिएको थियो । तर, खेलको ७० औं मिनेटमा पुलिसका सुमन लामाले गोल गर्दै टिमलाई जित दिलाए । पुलिसका परिवर्तित खेलाडी सुमन लामाले रबि पासवानको पासमा उत्कृष्ट गोल गरे ।

जुन गोल खेलको निर्णायक गोल बन्यो । पहिलो जितसँगै पुलिसले दुई खेलबाट ४ अंक जोडेको छ । लगातार दोस्रो हार बेहोरेको जावलाखेलले अंकको खाता खोल्न सकेको छैन ।

लिगमा सोमबार दुई खेल हुनेछ । आजको पहिलो खेलमा न्युरोड टिम एनआरी र ब्रिगेड ब्वाइज क्लब (बीबीसी)बीच दिउँसो १ बजे तथा दोस्रो खेलमा मच्छिन्द्र फुटबल क्लब र विभागीय त्रिभुवन आर्मी फुटबल क्लबबीत दिउँसो ४ः४५ बजे प्रतिस्पर्धा हुनेछ ।