एजेन्सी । टी–२० विश्वकपले नयाँ विजेता पाएको छ । अष्ट्रेलियाले न्युजिल्याण्डलाई आठ विकेटले हराउँदै पहिलो पटक टी–२० विश्वकपको उपाधि जित्न सफल भयो । दुबई अन्तर्राष्ट्रिय रंगशालामा टस हारेर ब्याटिङको निम्तो पाएको न्युजिल्यान्डले निर्धारित २० ओभरमा ४ विकेट गुमाएर एक सय ७२ रनको योगफल खडा गरेको थियो ।

कप्तान केन विलियमसनले सानदार अर्थशतकीय पारी खेलेपछि न्युजिल्यान्डले बलियो लक्ष्य दिएको थियो । तेस्रो नम्बरमा ब्याटिङमा आएका उनले ४८ बलमा ८५ रनको योगदान गरे । ओपनरहरु ड्यारेल मिचेल (११) र मार्टिन गुप्टिल(२८)ले पहिलो विकेटका लागि २८ रनको साझेदारी गरेका थिए । त्यसपछि आएका विलियमसनले तेस्रो विकेटका लागि ग्लेन फिलिप्ससँग मिलेर ६८ रनको साझेदारी गरेका थिए ।

फिलिप्सले १८ रनको योगदान गरे । जेम्स निसम र टिम सेइफर्ट अन्तिमसम्म टिक्दै टिमको स्कोर १७२ रन पु¥याए । निसम १३ रनमा नटआउट रहँदा सेइफर्ट ८ रनमा नटआउट रहे । अस्ट्रेलियाका जोस हेजलवुडले ३ विकेट लिँदा एडम जाम्पाले एक विकेट लिए ।

जवाफमा अष्ट्रेलियाले १८ ओभर पाँच बलमा दुई विकेट गुमाउँदै लक्ष्य पुरा गर्याे । सुरुवात राम्रो गर्न नसकेको उसले १५ रनमा पहिलो विकेट गुमायो । उसका आरोन फिन्च मात्र पाँच रनमा आउट भए । तर दोस्रो विकेटका लागि डेविड वार्नर र मिचेल मार्सले उत्कृष्ट ९२ रनको साझेदारी गरे ।

जसमा वार्नरले २८ बलमा चार चौका र तीन छक्काको मद्दतले ५३ रन बनाए । उनी यो टी २० विश्वकपमा सर्वाधिक रन बनाउने खेलाडीको सूचीमा दोस्रो स्थानमा रहे । उनले कुल दुई सय ८९ रन बनाए । यो पटकको विश्वकपमा धेरै रन बनाउने खेलाडी पाकिस्तानका बाबर आजम बने । उनले तीन सय तीन रन बनाए ।

वार्नर आउट भएपनि अष्ट्रेलियाका लागि मिचेल मार्स र ग्लेन म्याक्सवेलले सहज जित दिलाए । अष्ट्रेलियाका लागि मिचेल मार्सले अविजित ७७ रन बनाए । जसमा उनले ५० बलमा छ चौका र चार छक्का प्रहार गरे । यस्तै ग्लेन म्याक्सवेलले २८ रन जोडे । बलिङमा ट्रेन्ट बोल्टले दुई विकेट लिए ।

अष्ट्रेलियाले टी २० विश्वकपको उपाधि पहिलो पटक हात पारेको हो । यसअघि सन् २०१० मा फाइनलमा पुगेपनि इंग्ल्याण्डसँग सात विकेटले पराजित भएको थियो । यता पहिलो पटक फाइनलमा पुगेको न्युजिल्याण्डको उपाधि जित्ने सपना फेरी अधुरो बनेको छ ।