काठमाडौँ — अन्तरिक्ष पर्यटनको औपचारिक सुरुवात भएको छ । प्रविधि व्यवसायी एलन मस्कको कम्पनी स्पेस एक्सले बुधबार ४ जनालाई अन्तरिक्ष पर्यटको रुपमा अन्तरिक्षमा लगेसँगै अन्तरिक्ष पर्यटनको औपचारिक सुरुवात भएको हो ।

स्पेस एक्सले इन्सपिरेसन-४ मिसनअन्तर्गत अमेरिकाको फ्लोरिडास्थित केनेडी स्पेस सेन्टरबाट चारजनलाई अन्तरिक्ष यात्राका लागि बुधबार पठाएको हो । स्थानीय समय अनुसार बुधबार राति ८ बजे स्पेस एक्सको रकेटमार्फत उनीहरुलाई अन्तरिक्षमा पठाइएको हो । यो मिसनमा ३८ वर्षिय अर्बपति जेरेड इज्याकम्यानले लगानी गरेका छन् । यो मिसन पर्यटनका हिसाबले अन्तरिक्षमा उडान गरिएको स्पेस एक्सले जनाएको छ ।

यो मिसनमा २९ वर्षीया हेले अर्सेनियूस, ५१ वर्षीया सियान प्रोक्टर र ४२ वर्षीय क्रिस सेमब्रोस्की छन् । अर्सेनियूस हेलेले बाल अवस्थामा क्यान्सरलाई जितेकी हुन् । उनी हाल सेन्ट ज्युड अस्पतालमा फिजिसियनका रूपमा कार्यरत छिन् । उनी इजाकम्यानको अनुरोधमा यो यात्रामा सहभागी भएकी हुन् ।

सियान प्रोक्टर भौगर्भविद् हुन् । उनी एक सामुदायिक क्याम्पसमा पनि पढाउँछिन् । प्रोक्टरले सामाजिक सञ्जालमार्फत अन्तरिक्ष यात्राका लागि अवसर पाएकी हुन् । क्रिस सेमब्रोस्की भने लकहिड मार्टिन कम्पनीका कर्मचारी हुन् ।

अन्तरिक्ष पर्यटनयात्रीले अन्तरिक्षमा ३ दिन बिताउनेछन् । स्पेस एक्सको ड्रागन क्याप्सुलमा रहेका उनीहरु पृथ्वीदेखि ५६३ किलोमिटरको उचाइमा छन् । यो उचाइ अन्तर्राष्ट्रिय अन्तरिक्ष केन्द्र एक सय किलोमिटर माथि हो ।

यो तीन दिनको यात्राका क्रममा उनीहरुले हरेक ९० मिनेटमा पृथ्वीको एक फन्को लगाउँछन् । शनिबार उनीहरु पृथ्वीमा फर्कनेछन् । फ्लोरिडाको तटीय क्षेत्रमा अवतरण हुने सीएनएनले जनाएको छ ।

यो यात्रा अन्तरिक्ष पर्यटनका लागि विश्वका लागि नयाँ अभ्यास भएको बताइएको छ । यो मिसनको मूल्य करिब २०० मिलियन डलर खर्च हुने बताइएको छ । स्पेस एक्सको क्रियू ड्रागन क्याप्सुलको एक सिटको मूल्य ५५ मिलियन डलर लाग्छ ।