कोलम्बो – श्रीलङ्काको केन्द्रीय बैंकका प्रमुखले शुक्रबार ‘राजनीतिक र व्यक्तिगत मुद्दा’ कारण देखाउँदै राजीनामा दिएका छन् । विदेशी विनिमय सङ्कट तीव्र हुँदै गएपछि सरकारले आयातलाई नियन्त्रण गरेको छ ।

केन्द्रीय बैंक प्रमुख डब्ल्यू।डी। लक्ष्मणले विगत १० दिनको दौडान गम्भीर ‘मानसिक तनाव’ भएको बताउँदै ८० वर्षको उमेरमा आफ्नो योजनाबद्ध अवकाशभन्दा छ हप्ता अगाडि आगामी मङ्गलबार पदबाट हट्ने कुरा बताए ।

लक्ष्मणले राष्ट्रपति गोतबाया राजपाक्षको आर्थिक नीति तयार गरेको तर वैचारिक र व्यक्तिगत झडपका कारण यसलाई पूर्ण रुपमा कार्यान्वयन गर्न नसकेको बताए ।

वित्तमन्त्री बासिलले श्रीलङ्काले ‘खतरनाक विदेशी मुद्रा सङ्कट’ सामना गरेको घोषणा गरेको तीन दिनपछि केन्द्रीय बैंकका प्रमुख लक्ष्मणले राजीनामाको घोषणा भएको हो ।

अधिकांश निजी बैंकहरूको आवश्यक आयातका लागि लगानी गर्न विदेशी मुद्रा समाप्त भएको बताएपछि राष्ट्रपतिले गत हप्ता आर्थिक सङ्कटकालको अवस्था घोषणा गरेका थिए । पछिल्ला दिनहरूमा देशका विभिन्न सहरहरूमा चिनी र चामलका लागि दैनिक पसलहरूमा ठूलो लाइन देखिन थालेको छ ।

सरकारले मुद्रा बचाउनका लागि यसपहिले नै गाडी, केही खाना पकाउने तेल, मसला र अन्य सामान आयातमा रोक लगाइसकेको छ ।

बिहीबार केन्द्रीय बैंकले मोबाइल फोन, उपभोग्य वस्तु, टायर र लत्ताकपडाको आयातलाई वित्त पोषण गर्न ऋण उपलब्ध नगराउने भन्दै प्रतिबन्धलाई थप कडाइ गरेको हो ।