अमेरिकाको फ्लोरिडा राज्यको मायामी सहरमा १२ तले भवन भत्किँदा मृत्यु हुनेको संख्या ९ पुगेको छ । स्थानीय प्रशासनले अझै पनि १५० भन्दा धेरै मानिस बेपत्ता भएको बताएको छ ।

उद्धार कार्य जारी नै राखिएको सरकारी अधिकारीहरुको भनाइ छ । प्रशासनले धेरैभन्दा धेरै मानिसलाई बचाउने प्रयास गरिरहेको बताएको छ ।

गत बिहीबार मध्यरातितिर उक्त भवन ढलेको थियो । भवन किन ढल्यो अझैसम्म पनि पत्ता लाग्न सकेको छैन ।

उद्धारकर्मी घटनास्थलमा ठुला–ठुला मेसिन, ड्रोन र तालिमप्राप्त कुकुरको सहायताले मानिसको खोजी गरिरहेका छन् ।

दुर्घटनामा परी बेपत्ता हुनेहरूमा इजरायल र ल्याटिन अमेरिकाका मानिस पनि रहेका छन् । उद्धार गरिएका मानिसलाई होटलमा खानपिन र बसोबासको व्यवस्था गरिएको छ ।