काठमाडौँ – नेपाल क्रिकेट संघ, क्यानको आयोजनामा भइरहेको त्रिकोणात्मक क्रिकेट सिरिजको उपाधि भिडन्त आज हुँदैछ । त्रिदेशीय टि-२० क्रिकेट सिरिजको उपाधिका लागि नेपाल र नेदरल्याण्ड भिड्दैछन् । 

त्रिवि क्रिकेट मैदानमा उपाधिका लागि दुई आमनेसामने हुँदैछन् । उपाधि भिडन्त दिउँसो सवा १ बजे सुरु हुने छ । घरेलु मैदानमा उपाधिको भोक मेटाउने तयारीमा रहेको नेपाल कोरोना महामारीमा वितेको १४ महिना र त्यसपछिको मैदानको उपस्थितिलाई यादगार बनाउने दाउमा छ । 

नेपालसँगको पहिलो खेलमा पराजित भएर दोस्रोमा विजेता बनेको नेदरल्यान्ड पनि नेपाललाई घरेलु मैदानमा पराजित गर्दै सिरिजको उपाधि जित्न चाहन्छ । तर, उपाधि जित्न दुवै टोलीलाई त्यति सहज भने छैन । सिरिजको पहिलो खेलमा नेदरल्यान्डलाई नेपालले ९ विकेटले पराजित गरेको थियो । तर, नेदरल्यान्डसँग सिरिजको दोस्रो खेलमा नेपाल ३ विकेटले पराजित भएको थियो ।