इंग्लिस प्रिमियर लिग फुटबलमा ग्यारेथ बेल र ह्यारी केनले दुई दुई गोल गरेपछि टोटनह्याम हटस्परले क्रिष्टल प्यालेसमाथि ४–१ गोल अन्तरको सानदार जीत दर्ता गरेको छ ।

आइतबार राति घरेलु मैदानमा टोटनह्यामलाई जिताउन बेल र केनले दुई दुई गोल गर्दा क्रिष्टलका क्रिष्टियन बेनटेकले एक गोल फर्काए ।

२५ औं मिनेटमा केनको सहयोगमा बेलले गोल गर्दै टोटनह्यामलाई अग्रता दिलाएका थिए । तर, पहिलो हाफको अतिरिक्त समयका पहिलो मिनेटमा बेनटेकले गोल गरेपछि क्रिष्टलले पहिलो हाफ एक एक गोलको बराबरीमा ल्याएको थियो ।

पहिलो हाफ एक एक गोलको बराबरी खेलेको टोटनह्यामले दोस्रो हाफमा तीन गोल थप्दै फराकिलो जीत दर्ता गर्न सफल भयो । बेलले केनकै पासमा ४९ औं मिनेटमा गोल गरेपछि टोटनह्यामले २–१ ले अघि बढेको थियो ।

त्यसको तीन मिनेटपछि केनले व्यक्तिगत पहिलो गोल गर्दा टोटनह्याम ३–१ ले अघि बढेको थियो । यसैगरी ७६ औं मिनेटमा सन हिउङ मिनको पासमा केनले गोल गर्दै टोटनह्यामलाई ४–१ गोलको जीत दर्ता गरे ।

यो नतिजासँगै टोटनह्याम २७ खेलबाट ४५ अंक जोड्दै छैटौं स्थानमा उक्लदा पराजित भएको क्रिष्टल ३४ अंकका साथ १३ औं स्थानमा छ ।