काठमाडौँको गोंगबुमा एक पुरुषको हत्या गरी टाउको र खुट्टा काटेकी कल्पना मुडभरीलाई अदालतले आजीवन कारावास सजाय सुनाएको छ।

काठमाडौँ जिल्ला अदालतका न्यायाधिश राजेन्द्र अधिकारीको एकल इजलासले ३७ वर्षीया मुडभरीलाई आजीवन कारावासको सजायको फैसला गरेको हो ।

फैसलापछि कल्पनाले अब जीवनभर जेलमै बस्नुपर्ने छ। तर जिल्ला अदालतले गरेको उक्त फैसलाविरुद्ध भने उनले पुनरावेदन दिन सक्ने छिन् ।

निर्ममतापूर्वक मारेको भन्दै कल्पनालाई जन्मकैदको सट्टा आजीवन कारावासको फैसला गरेको हो । श्रीमानसँग अलग भएर छोरीसँग बस्दै आएकी कल्पनाले लकडाउनको समयमा रोल्पाको रून्टीगढी गाउँपालिका ७ का कृष्णबहादुर बोहराको हत्या गरी टाउको र खुट्टा कोटेर फालेकी थिइन् ।

गोंगबुस्थित एक होटलमा बस्दै आएका ४५ वर्षीय बोहोरा कल्पनाको कोठामा नियमित आउजाउ गर्दै आएका थिए । घटनापछि डेराबाट छोरीसहित कल्पना भागेर चितवन पुगेकी थिइन् । आमा छोरीलाई प्रहरीले चितवनबाट पक्राउ गरेको थियो।

अदालतले उक्त घटनामा मतियार बनाइएकी कल्पनाकी छोरीलाई भने सफाइ दिएको छ। ती किशोरीले कल्पनाले मारेपछि शव व्यवस्थापन गर्न सघाएको प्रहरीको आरोप थियो।