इंग्लिस प्रिमियर लिग फुटबलमा चेल्सीले टोटनह्यामलाई १–० गोल अन्तरले पराजित गरेको छ ।

नेपाली समय अनुसार शुक्रबार विहान सकिएको खेलमा टोटनह्यामकै मैदानमा चेल्सी विजयी हुँदै तालिकाको छैटौं स्थानमा पनि उक्लिएको छ । घरेलु मैदानमा पराजित भएपछि टोटनह्यामका प्रशिक्षक जोसे माउरिन्होले रेफ्रि आन्द्रे मारिनरको भने आलोचना गरेका छन् ।

उता, चेल्सीमा नयाँ प्रशिक्षक थोमस टचेल आएपछि तेस्रो खेलसम्म अपराजित रहेको छ ।

२४ औं मिनेटमा टोटनह्यामका एरिक डायरले टिमो वेर्नरलाई फल गरेपछि पाएको पेनाल्टीमा जर्जिन्होले गोल गर्दै चेल्सीलाई अग्रता दिलाएका थिए ।

सोही अग्रता चेल्सीले अन्तिमसम्म जोगाउँदै स्पष्ट तीन अंक लिन सफल भयो ।