युरोपेली संघ ‘ईयू’ले औषधि कम्पनी एस्ट्राजेनिकालाई बेलायतमा रहेको उत्पादन केन्द्रबाट कोरोना विरुद्धको खोपको थप मात्रा उपलब्ध गराउन माग गरेको छ ।

पूर्व प्रतिबद्धता अनुसार यो वर्षको पहिलो त्रैमासिकमा केही मात्रा मात्रै खोप उपलब्ध गराउनसक्ने एस्ट्राजेनिकाले निर्णय गरेपछि ईयूले यस्तो माग राखेको हो ।

कम्पनीले युरोपमा रहेका आफ्ना प्लान्टमा समस्या आएका कारण खोप उपलब्ध गराउन नसकेको जनाएको छ । ईयूले त्यस्तो अभावलाई अन्यत्रको उत्पादनले नै भए पनि पूर्ति गर्नुपर्ने बताएको छ ।

खोप दिने काममा ढिलासुस्ती भैरहेको भन्दै युरोपमा इयुको आलोचना भैरहेको छ । खोप उपलब्ध नगराएपछि एस्ट्राजेनिकाबीचको गोप्य सम्झौता सार्वजनिक गर्ने चेतावनी ईयूले दिएको छ । जनवरी र मार्चका लागि ईयूले यसअघि सम्झौता गरेभन्दा साठी प्रतिशत कम डोज खोप पाउने बताइएको छ ।

नेदरल्याण्ड्स र बेल्जियमका उत्पादन केन्द्रमा समस्या आएको भन्दै सो कम्पनीले आफूहरू ’दुई महिना ढिलो’ हुने जनाएको हो । एस्ट्राजेनिकाको खोपलाई शुक्रवार इयूको औषधी नियामकले अनुमति दिने तयारी गरेको छ ।

ईयूले गत अगस्टमा एस्ट्राजेनिकासँग ३० करोड मात्रा खोपको लागि एउटा सम्झौता गरेको थियो । जसमा सम्भव भए थप १० करोड डोज उपलब्ध गराउने विषय समेत समेटिएको छ ।

इटलीले ढिलासुस्तीको यस विषयलाई लिएर कानूनी उपचारमा जाने चेतावनी दिएको छ । ईयूसँग ठूलो खोपको सम्झौता गरेको फाइजर र बायोएनटेकले समेत ढिलासुस्ती गरिरहेको छ । यो वर्षको अन्त्यसम्ममा उसले साढे १२ करोड मात्रा खोप उत्पादनमा सघाउने जनाएको छ ।