एट्लेटिको मड्रिडले स्पेनिस ला लिगाको शीर्ष स्थानमा ७ अंकको अग्रता बनाएको छ । विहीबार रातिको खेलमा एइबरमाथि २–१ गोल अन्तरको जित निकालको मड्रिडले तालिकामा ४४ अंक बनाउँदा दोस्रो स्थानमा रहेको रियल मड्रिडको ३७ अंक मात्रै छ ।

अझै एट्लेटिकोले एक खेल कम खेलेको छ । एट्लेटिकोलाई जिताउनका लागि लुईस सुआरेजले २ गोल गर्दा एइबरका मार्को डिमिट्रोभिकले एक गोल गरेका थिए ।

एइबरका डिमिट्रोभिकले पेनाल्टी मार्फत १२ औं मिनेटमा अग्रता दिलाएका थिए । तर उक्त अग्रता पहिलो हाफभरी पनि टिक्न सकेन । लुईस स्वारेजले ४० औं मिनेटमा गोल गर्दै एट्लेटिकोलाई खेलमा फर्काए । ८९औं मिनेटमा सुआरेजले पेनाल्टीमार्फत व्यक्तिगत दोस्रो गोल गर्दै एट्लेटिकोलाई जित दिलाए ।
एट्लेटिकोको १७ खेलबाट ४४ अंक पुगेको छ । दोस्रो स्थानमा रहेको रियल म्याड्रिडको १८ खेलबाट ३७ अंक रहेको छ । पराजित भएको एइवर १९ अंकसहित १५औं स्थानमा छ ।