काठमाडौं । पछिल्लो २४ घण्टामा नेपाल थप १२ जना कोरोना संक्रमितको मृत्यु भएको छ । यससँगै हालसम्म मुलुकमा कोरोना संक्रमणका कारण मृत्यु हुनेको संख्या १६६३ पुगेको हो ।

यस्तै, पछिल्लो २४ घण्टामा ७ हजार २३२ जनाको पीसीआर परीक्षण गरिएकोमा एक हजार २१७ मा कोरोना पुष्टि भएको स्वास्थ्य तथा जनसंख्या मन्त्रालयले जनाएको छ । मन्त्रालयका अनुसार ७७४ पुरुष र ४४३ महिलामा संक्रमण पुष्टि भएको हो। यससँगै हालसम्म मुलुकमा कोरोना संक्रमित हुनेको संख्या २ लाख ४५ हजार ६५० जना पुगेको छ । हालसम्म १८ लाख १३ हजार २०४ नमूनाको पीसीआर परीक्षण गरिएको मन्त्रालयले जनाएको छ । 

स्वास्थ्य तथा जनसंख्या मन्त्रालयका अनुसार हाल मुलुकमा कोरोनाका सक्रिय संक्रमितको संख्या भने १२ हजार ३८६ रहेको छ । सोही अवधिमा १०६४ जना संक्रमित निको भएका छन् । यससँगै हालसम्म कोरोना संक्रमण निको हुनेको संख्या २ लाख ३१ हजार ६०१ पुगेको मन्त्रालयले जनाएको छ। हाल क्वारेन्टिनमा ५१५ जना रहेका छन् ।