काठमाडौं, २९ माघ । आईसीसी विश्वकप क्रिकेट लिग–२ अन्तर्गत त्रिकोणात्मक सिरिजमा नेपालले प्रतियोगिताको अन्तिम खेलमा आज अमेरिकासँग खेल्दैछ ।

घरेलु मैदानमा भएको लिगमा सोचेको जस्तो प्रदर्शन गर्न नसकेको नेपाली टिम अन्तिम खेलमा जित निकाल्दै सुखद् अन्त्य गर्न चाहन्छ । यो प्रतियोगितामा नेपालले तीन खेलमा दुईमा हार र एकमा जित निकालेको छ ।

कीर्तिपुरस्थित त्रिवि क्रिकेट मैदानमा हुने दुई टोलीबीचको खेल बिहान ९ः३० बजेबाट सुरु हुनेछ । नेपाल पहिलो खेलमा ओमानसँग १८ रनको हार ब्यहोरेको थियो भने दोस्रो खेलमा अमेरिकालाई ३५ रनले हराएको थियो । त्यस्तै तेस्रो खेलमा नेपाल ओमानसँग आठ विकेटले पराजित भएको थियो ।

यो लिगमा नेपालको ओपनिङमा निकै समस्या देखिएको छ । यसका साथै नेपालको ब्याटिङलाइन–अपले पनि राम्रो गर्न सकेको छैन ।
अमेरिका पनि अन्तिम खेलमा नेपालसँग जित निकालेर प्रतियोगिताको सुखद् अन्त्य गर्ने लक्ष्यमा छ ।