काठमाडौं, २७ माघ । शहीद स्मारक ए डिभिजन लिग फुटबलमा आजदेखि १२ औं चरणको खेल शुरुहुँदै छ । अब सवै टिमका दुई दुई खेल बाँकी छन् । शीर्ष स्थानमा रहेको त्रिभुवन आर्मीको २६ अंक छ भने दोस्रो स्थानमा रहेको मछिन्द्रको २५ तथा तेस्रो स्थानमा रहेको मनाङको २२ अंक छ । यी तीन टिमबीच उपाधि होड खुला रहेको छ ।

१२ औं चरण अन्तर्गत आज तीन खेल हुँदै छन् । पहिलो खेल विहान पौने ९ बजे एपीएफ र फ्रेण्ड्स भिड्ने छन् । एपीएफ पुछारबाट दोस्रो स्थानमा छ भने फ्रेण्ड्स नवौं स्थानमा छ । यस्तै अर्को खेलमा सवा १२ बजे च्यासल र सरस्वती भिड्ने छन् । च्यासल १० औं तथा सरस्वती पुछारमा छ ।

तेस्रो खेलमा दिउँसो साढे ३ बजे संकटा र मछिन्द्र आमने सामने हुने छन् । यो खेलमा मछिन्द्र विजयी भए शीर्ष स्थानमा उक्लने छ भने पराजित भए उपाधि होडमा पछि पर्ने खतरा रहने छ । गत संस्करणको उप विजेता संकटालाई पनि टप सिक्सभित्र पर्नका लागि जित आवश्यक छ ।